Бугун АҚШ тарихида биринчи марта собиқ президент жиноятда расман айбланаётган суд ишида Доналд Трамп Нью-Йоркда жиноий айбловлар юзасидан судланади.
Трамп 2016 йилда президентликка сайланиш учун кампания олиб бораётган пайтда ўтмиши ҳақида оғиз очмаслиги учун порн-юлдуз Сторми Даниелс ва босқаларга пул бериб, расмий ҳужжатларда буни юридик хизмат дея яширганликда айбланмоқда.
Нью-Йоркнинг Манҳеттан тумани прокуратураси Трампга бу қилмиш билан боғлиқ қарийб 30 айблов қўймоқда.
Америка тарихида бирор собиқ президент бу каби ҳолатга тушмаган, яъни жиноятда айбланмаган. Айни дамда Трамп Оқ уй учун ҳаракат бошлаб, 2024 йилда сайланиш умидида.
Полицияга ўз хоҳиши билан боришга аҳд қилган собиқ президент айбловларни асоссиз ва сохта деб билади.
Унинг тарафдорлари Нью-Йоркда катта намойшлар бошламоқда.
Суд мажлислари маҳаллий вақт билан 14:15 га белгиланган. Трамп ҳибсга олинмайди ва судга қўлига кишан билан келтирилмайди, чунки у ўз ихтиёри билан судга келади.
Кейинги суд мажлиси бир неча ойдан кейин бўлиб ўтиши мумкин. Бир қатор оммавий ахборот воситаларининг фотосуратчилари суд залига киритилади, лекин видео тасвирга олиш тақиқланади.
Назарий жиҳатдан, судья Трампни ҳибсга олишга буйруқ бериши мумкин, аммо бу даргумон. Катта эҳтимол билан, AP таъкидлаганидек, у кейинги суд мажлисига қадар гаровсиз ҳам озод қилинади. Трамп сешанба куни кечқурун Нью-Йоркка қайтиб, ўз тарафдорларига мурожаат қилиш режаларини аллақачон эълон қилган. Айблов қўйиш унинг сайловолди кампаниясига халақит бермайди.
Нью-Йоркда хавфсизлик чоралари кучайтирилмоқда, Трамп тарафдорлари намойишлари кутилмоқда. Уларнинг ўзлари тинч йўл билан норозилик намойишини ўтказишларини билдиришмоқда.
